INEC Ta Ce An Tattara PVC Sama da Miliyan 1.9 a Jihar Osun

Hukumar Zaɓe Mai Zaman Kanta (INEC) ta bayyana cewa masu kaɗa ƙuri’a 1,906,390 ne suka karɓi katin zaɓe na dindindin (PVC) daga cikin mutane 2,339,233 da suka yi rajista a Jihar Osun, gabanin zaɓen gwamna da za a gudanar ranar Asabar.

INEC ta ce adadin PVC ɗin da aka karɓa ya kai kashi 81.50 cikin 100 na jimillar masu rajista a jihar.

A cikin wata sanarwa da Kwamishinan Ƙasa kuma Shugaban Kwamitin Yaɗa Labarai da Wayar da Kan Masu Zaɓe na INEC, Mohammed Kudu Haruna, ya fitar, hukumar ta ce sauran PVC 426,842, waɗanda suka yi daidai da kashi 18.50 cikin 100, an adana su cikin tsaro a Babban Bankin Najeriya (CBN), bisa tsarin da hukumar ta saba bi.

Hukumar ta kuma bayyana cewa wasu masu zaɓe da katunansu suka lalace, suka ɓaci ko suka ɓace sun nemi a sauya musu su.

INEC ta ce daga cikin waɗanda suka nemi sauya katunansu, mutane 6,101 sun buga kwafin PVC ɗinsu da za a iya saukewa ta yanar gizo.

Hukumar ta ƙara da cewa ta wallafa jadawalin yawan PVC da aka karɓa daga rumfar zaɓe zuwa rumfar zaɓe a shafinta na intanet.

INEC ta tabbatar wa jam’iyyun siyasa, ƙungiyoyin fararen hula, kafafen yaɗa labarai da al’ummar Jihar Osun cewa ta shirya tsaf domin gudanar da zaɓen gwamna na ranar Asabar, 15 ga Agusta, 2026, cikin ’yanci, adalci, sahihanci, gaskiya da kuma bai wa kowa dama.