Koriya ta Kudu na shirin tura sojoji zuwa mashigin Hormuz

Kafofin yaɗa labarai na Koriya ta Kudu sun ruwaito cewa gwamnatin ƙasar na shirin tura sojoji da kayan aiki domin tallafawa abin da ta kira “’yancin zirga-zirga a mashigin Hormuz”, tare da fara aikin kafin ƙarshen wannan shekara.

Kamfanin dillancin labarai na Reuters ya ruwaito a ranar Alhamis, 3 ga Satumba, cewa majiyoyin gwamnati da na soja sun ce Seoul na ɗaukar matakan doka domin samun amincewar majalisar dokoki kan tura sojojin.

Rahotannin sun ce an riga an tattauna shirin a wani taron majalisar ministoci, yayin da ake shirin gabatar da buƙatar amincewa a hukumance ga majalisar dokokin ƙasar a cikin watan Satumba.

Shirin na zuwa ne a daidai lokacin da matsalolin tsaro a mashigin Hormuz suka ƙaru, musamman hare-haren da ake kai wa jiragen kasuwanci a yankin cikin makonnin baya-bayan nan.

Mashigin Hormuz na daga cikin muhimman hanyoyin safarar makamashi a duniya, lamarin da ya sa ƙasashe da dama ke nazarin matakan da za su ɗauka domin kare zirga-zirgar jiragen ruwa da jigilar kayayyaki ta wannan hanya.

Sai dai kawo yanzu, gwamnatin Koriya ta Kudu ba ta fitar da wata sanarwa a hukumance da ke tabbatar da shirin tura sojojin ba.