Kamfanin TikTok ya amince da biyan dala miliyan 400 domin sasanta wata ƙara da gwamnatin Amurka ta shigar kan zargin keta haƙƙin sirrin yara, a wani babban matakin sasanta shari’a da ya shafi kamfanin.
Ma’aikatar Shari’a ta Amurka ce ta shigar da ƙarar a shekarar 2024, a lokacin gwamnatin tsohon Shugaba Joe Biden, inda ta zargi TikTok da kamfaninsa na iyaye, ByteDance, da tattara “ɗimbin bayanai” kan miliyoyin yara ‘yan ƙasa da shekaru 13 da ke amfani da manhajar.
Gwamnatin ta ce hakan ya saɓa wa dokar tarayya ta Children’s Online Privacy Protection Act (COPPA), wadda aka kafa a shekarar 2000 domin kare bayanan sirrin yara a intanet.
Mataimakin Babban Lauyan Amurka, Brett Schumit, ya ce yarjejeniyar za ta taimaka wajen tabbatar da cewa yara da iyayensu sun samu ƙarin kariya fiye da yadda lamarin yake a lokacin da aka fara shari’ar.
TikTok ba shi ne kamfani na farko da ya fuskanci irin wannan mataki ba. A shekarar 2019, YouTube ya amince da biyan dala miliyan 170 kan zargin keta dokar, yayin da Epic Games, mai ƙirƙirar wasan Fortnite, ya biya dala miliyan 275 a shekarar 2022.
A halin yanzu, kamfanin Meta, mai mallakar Facebook da Instagram, shi ma na fuskantar wata babbar shari’a kan zargin cutar da yara ta hanyar yadda yake tsara manhajojinsa da kuma amfani da bayanan masu amfani.
Manyan lauyoyin jihohi daga jihohin Amurka 29 ne suka shigar da ƙarar, inda suke zargin Meta da ƙoƙarin jawo hankalin yara zuwa Facebook da Instagram domin samun riba daga amfani da manhajojin.
An fara sauraron wannan shari’a a wannan makon, kuma idan aka samu Meta da laifi, kamfanin na iya fuskantar tarar da ta kai daruruwan biliyoyin daloli.