An tsinci wata jaririya da ake zargin an yi an jefar da ita a kwali jim kaɗan bayan haihuwarta a dajin Ashar da ke cikin yankin Wuese na Ƙaramar Hukumar Konshisha ta Jihar Benue.
Rahotanni sun bayyana cewa an gano jaririyar, wadda ake kyautata zaton ta shafe kusan kwanaki uku a cikin dajin, a ranar Asabar inda wani mazaunin yankin, Madam Mbakasev Yisa, ta gano ta bayan da ta ji alamun cewa akwai alamun motsi a cikin kwali.
An nade jaririyar da tufafi sannan aka sanya ta cikin kwali, inda ake zargin an samu tsutsotsi a kusa da jikinta, yayin da wani wari mai tsanani ke fitowa daga cikin kwalin.
Wani ganau, Terkumbur Gabriel Mbaukaan, wanda ya tabbatar wa manema labarai da faruwar lamarin ta wayar tarho a Makurdi ranar Lahadi, ya ce jaririyar tana cikin mawuyacin hali lokacin da aka ceto ta.
Yisa, wadda ta gano jaririyar, ta ce nan take suka kai rahoton lamarin ga ofishin ’yan sanda da ke yankin. Bayan haka, ’yan sandan sun je wurin da aka gano jaririyar, tare da rubuta bayanan lamarin, sannan suka bayar da umarnin a kai jaririyar zuwa wata cibiyar lafiya domin a kula da ita.