Shugaban Iran, Masoud Pezeshkian, ya gana da takwaransa na Rasha, Vladimir Putin, a gefen taron Ƙungiyar Haɗin Kan Shanghai, SCO, da aka gudanar a birnin Bishkek na ƙasar Kyrgyzstan.
A cewar fadar shugaban ƙasar Iran, shugabannin biyu sun duba halin da dangantakar Iran da Rasha ke ciki, tare da tattauna hanyoyin ƙara ƙarfafa da faɗaɗa haɗin gwiwa a fannoni daban-daban.
Ganawar ta zo ne a daidai lokacin da ake fuskantar ƙarin tashin hankali tsakanin Iran da Amurka. Pezeshkian ya bayyana dangantakar Tehran da Moscow a matsayin wata muhimmiyar alaƙa ta dabarun siyasa, yayin da Putin ya ce Rasha na nuna goyon baya ga al’ummar Iran.
A wani ɓangare, kakakin fadar Kremlin, Dmitry Peskov, na cikin tawagar Putin da ta halarci taron, yayin da ake sa ran shugaban na Rasha zai samu bayanai kan abubuwan da ke faruwa dangane da ƙoƙarin diflomasiyya tsakanin Iran da Amurka.