Kakakin Majalisar Ɗinkin Duniya, Stéphane Dujarric, ya ce Babban Sakataren Majalisar, António Guterres, na matuƙar damuwa da sake barkewar musayar hare-haren soji tsakanin Amurka da Jamhuriyar Musulunci ta Iran a daren Talata.
Dujarric ya ce Babban Sakataren ya fi nuna damuwa kan rahotannin da ke cewa an samu asarar rayukan fararen hula, ciki har da mutanen da aka ce sun mutu sakamakon wani hari da aka kai wa wani bikin aure.
Ya jaddada cewa kai hari kan fararen hula ba abin yarda ba ne ta kowace hanya.
Da yake magana a taron manema labarai na yau da kullum, Dujarric ya ce Babban Sakataren Majalisar Ɗinkin Duniya na kira ga dukkan ɓangarorin da abin ya shafa da su nuna matuƙar kame kai, tare da mutunta wajibcin da dokokin jin ƙai na ƙasa da ƙasa suka ɗora musu.
Ya kuma buƙaci ɓangarorin da su guji duk wani mataki ko furuci da zai iya ƙara rura wutar rikicin.
A cewar Dujarric, António Guterres na ci gaba da yin imanin cewa babu wata mafita ta soja ga wannan rikici, yana mai cewa diflomasiyya ce hanya mafi dacewa ta warware matsalar.
Ya ce Babban Sakataren ya yi kira ga dukkan ɓangarorin da su koma teburin tattaunawa tare da farfaɗo da ƙoƙarin diflomasiyya ba tare da wani ƙarin jinkiri ba.
A halin da ake ciki, António Guterres ya gudanar da ganawa da tattaunawa da ɓangarori daban-daban kan rikicin, inda ya jaddada muhimmancin tattaunawa da hanyoyin lumana domin rage tashin hankali da kuma kauce wa ƙarin asarar rayuka.