Fitacciyar jarumar Kannywood, Nafisa Abdullahi, ta janyo muhawara a kafafen sada zumunta bayan bayyana ra’ayinta game da aure, inda ta ce a ganinta babu wani abu a cikin aure face nauyi da ya fi rataya a wuyan mata.
Jarumar ta bayyana hakan ne a wani faifan bidiyo da ya yaɗu a shafukan sada zumunta, inda ta tattauna kan yadda take kallon rayuwar aure da kuma matsayin mata a cikinta.
A cewarta, wasu daga cikin abubuwan da mata ke fuskanta bayan shiga rayuwar aure na sa ta ganin cewa akwai nauyi mai yawa da ke kan mata idan aka kwatanta da maza.
Kalaman nata sun haifar da martani mabambanta daga jama’a, musamman a kafafen sada zumunta.
Wasu masu sharhi sun bayyana goyon bayansu ga ra’ayin jarumar, suna masu cewa mata na fuskantar ƙalubale da nauye-nauye da dama a rayuwar aure, musamman wajen kula da gida da tarbiyyar yara.
Sai dai wasu kuma sun soki furucin nata, suna masu cewa aure haɗin kai ne da fahimtar juna tsakanin ma’aurata, kuma ba daidai ba ne a bayyana shi a matsayin bautar da mata.
Har zuwa lokacin hada wannan rahoto, muhawara kan furucin na ci gaba da gudana, inda mutane ke bayyana mabambantan ra’ayoyi kan matsayin mata a aure da kuma yadda za a inganta adalci, fahimta da zaman lafiya tsakanin ma’aurata.