Hukumar Hana Sha da Fataucin Miyagun Ƙwayoyi ta Ƙasa (NDLEA) ta sanar da ƙwace miyagun ƙwayoyi da darajarsu ta kai kusan naira biliyan 5 a tashar jiragen ruwa ta Onne da ke Jihar Rivers.

Kwamandan NDLEA na tashar Onne, Omerio Odo, ne ya bayyana hakan yayin bikin Ranar Yaƙi da Ta'ammali da Fataucin Miyagun Ƙwayoyi ta Duniya ta shekarar 2026.

A cewarsa, kayayyakin da aka ƙwace sun haɗa da kwantena bakwai ɗauke da sama da ƙwayoyi miliyan 3.5 na nau'in opioids da kuma kwalabe miliyan 1.2 na codeine, tare da jimillar nauyin kayayyakin da ya kai tan 206.

Ya bayyana cewa nasarar ta samu ne sakamakon ingantaccen tattara bayanan sirri, ƙara tsaurara matakan sa ido, da kuma haɗin gwiwa tsakanin NDLEA da sauran hukumomin tsaro da masu ruwa da tsaki a harkokin tashoshin jiragen ruwa.

Odo ya ce miyagun ƙwayoyin da aka kama na da matuƙar illa ga lafiyar jama'a, iyalai da kuma zaman lafiyar al'umma baki ɗaya.

Ya kuma yi gargaɗin cewa, duk da muhimmancin tashar Onne wajen harkokin kasuwanci, masu safarar miyagun ƙwayoyi na ci gaba da ƙoƙarin amfani da hanyoyin ruwa domin shigo da haramtattun kayayyaki cikin ƙasar.

Kwamandan ya jaddada cewa NDLEA za ta ci gaba da ɗaukar tsauraran matakai wajen daƙile fataucin miyagun ƙwayoyi, tare da kira ga gwamnati, hukumomin tsaro, masu harkokin dakon kaya da sauran al'umma su ƙara haɗa kai wajen yaƙi da wannan matsala.

Ya kuma buƙaci masu harkokin jigilar kaya su riƙa binciken kayayyakinsu da kyau, tare da kai rahoton duk wani abu da suke zargi ga hukumomin da abin ya shafa.