TCN Ta Sanar da Katse Wutar Lantarki na Wucin Gadi a Kano da Wasu Jihohi Biyar

Kamfanin Watsa Wutar Lantarki na Najeriya (TCN) ya sanar da cewa mazauna da 'yan kasuwa a jihohin Kano, Katsina, Jigawa, Bauchi da Yobe za su fuskanci katsewar wutar lantarki na wucin gadi a ranar Lahadi saboda aikin gyaran cibiyar watsa lantarki.

A wata sanarwa da mai magana da yawun kamfanin, Ndidi Mbah, ta fitar ranar Juma'a, TCN ta bayyana cewa katsewar za ta kuma shafi garin Gazaoua da ke Jamhuriyar Nijar.

Sanarwar ta ce za a gudanar da aikin gyaran ne a tashar watsa lantarki mai ƙarfin kilovolt 330 da ke Kumbotso a Jihar Kano, inda ake ci gaba da inganta kayan aikin domin ƙarfafa tsarin watsa lantarki da kuma inganta ingancin samar da wuta.

A cewar kamfanin, aikin zai bai wa masu kwangila damar ci gaba da sauya wasu muhimman na'urorin tashar da kuma maye gurbin tsofaffin wayoyin lantarki masu ƙarfin milimita murabba'i 350 da sabbin wayoyi masu ƙarfin milimita murabba'i 800 domin ƙara ƙarfin hanyar watsa lantarki.

Saboda wannan aiki, Kamfanin Rarraba Wutar Lantarki na Kano (KEDCO), da wasu sassan Kamfanin Rarraba Wutar Lantarki na Jos (JEDC) da na Yola (YEDC), ba za su samu wutar da za su rarrabawa abokan hulɗarsu ba a lokacin aikin.

Hakan zai shafi masu amfani da wutar lantarki a jihohin Kano, Katsina da Jigawa, da kuma Azare a Jihar Bauchi, Nguru a Jihar Yobe, da kuma garin Gazaoua a Jamhuriyar Nijar.

TCN ta bayyana cewa katsewar wutar na wucin gadi ce, kuma wajibi ne domin kammala muhimman ayyukan inganta cibiyar watsa lantarki, waɗanda za su taimaka wajen samar da ingantacciyar wutar lantarki mai ɗorewa a yankunan da abin ya shafa.