Tsananin zafin rana da ya kai kusan digiri 40 a ma'aunin Celsius tare da iska mai ƙarfi sun ƙara rura gobarar daji a sassan kudancin Turai, lamarin da ya sa dubban jami'an kashe gobara ke ci gaba da fafutukar shawo kan bala'in.
Gobarar ta bazu a ƙasashen Portugal, Spain, Girka da Faransa, inda ta ƙone dubban hekta na dazuka da ciyayi tare da tilasta hukumomi ɗaukar matakan gaggawa domin kare rayuka da dukiyoyin al'umma.
A gabashin tsaunukan Pyrenees na Faransa, gobarar na ci gaba da yaɗuwa cikin sauri sakamakon iska mai ƙarfi da matsanancin zafi. Hakan ya sa hukumomi suka hana jama'a tsayawa a wasu sassan hanyar gasar tseren keke ta Tour de France, wadda za ta bi yankin.
A Girka kuma, gobarar ta lalata masana'antu biyu da ke kusa da birnin Thessaloniki, yayin da jami'an agajin gaggawa ke ƙoƙarin hana ta bazuwa zuwa yankunan da ake zaune.
Sai dai a arewacin Portugal, hukumomi sun bayyana cewa an samu gagarumar nasara wajen shawo kan wata babbar gobara, duk da cewa ana ci gaba da sanya ido saboda fargabar sake ruruwa sakamakon ci gaba da tsananin zafi da iska.