Ina da burin komawa jami'a domin ci gaba da karatu bayan ya kammala harkokin kwallon kafa - Victor Osimhen

Tauraron ƙungiyar Super Eagles ta Najeriya, Victor Osimhen, ya bayyana cewa yana da burin komawa jami’a domin ci gaba da karatu bayan ya kammala rayuwarsa ta buga ƙwallon ƙafa.

Osimhen ya ce duk da irin nasarorin da ya samu a harkar ƙwallo, ya yi imanin cewa ilimi na da muhimmiyar rawa wajen tabbatar da rayuwa mai kyau bayan ritaya daga wasanni.

Ya bayyana cewa yana son samun digirin jami’a domin ƙara ilimi da kuma shirya kansa don rayuwa bayan ƙwallon ƙafa.

Dan wasan ya ƙarfafa matasa da sauran ‘yan wasa da su mai da hankali kan ilimi tare da sana’arsu, yana mai cewa ƙwallon ƙafa ba ta dawwama, amma ilimi na ci gaba da amfani a tsawon rayuwa.

Kalaman Osimhen sun sake jawo hankali kan muhimmancin haɗa ilimi da sana’a, musamman ga matasa masu neman gina makoma mai ɗorewa bayan rayuwar wasanni.