An sayar da rigar da Pele ya sanya a wasan karshe na Kofin Duniya na 1958 kan dala miliyan $4.9

Rigar da fitaccen gwarzon ƙwallon ƙafa na Brazil, Pele, ya sanya a wasan ƙarshe na Gasar Kofin Duniya ta shekarar 1958, ta zama rigar ƙwallon ƙafa ta biyu mafi tsada da aka taɓa sayarwa a gwanjo.

An sayar da rigar ne kan kuɗin da ya kai dala miliyan 4.9, lamarin da ya sanya ta cikin rigunan wasanni mafi daraja da aka taɓa yi wa gwanjo a duniya.

Sai dai har yanzu rigar da fitaccen ɗan wasan Argentina, Diego Maradona, ya sanya a wasan da ƙasarsa ta buga da Ingila a Gasar Kofin Duniya ta 1986 ce ke riƙe da tarihin zama rigar ƙwallon ƙafa mafi tsada da aka taɓa sayarwa.

An sayar da rigar Maradona ne kan fam miliyan 7.1, bayan gwanjon da ya jawo hankalin masoya ƙwallon ƙafa da masu tara kayan tarihi daga sassa daban-daban na duniya.

Rigunan Pele da Maradona na ci gaba da kasancewa cikin kayan tarihi mafi daraja a duniyar ƙwallon ƙafa, saboda irin rawar da waɗannan fitattun ’yan wasa suka taka wajen sauya tarihin wasan a duniya.