Tinubu Ya Amince Da Naɗin Sabbin Shugabanni Da Mambobi A Hukumomin Tarayya

Shugaban Ƙasa, Bola Ahmed Tinubu, ya amince da naɗin sabbin shugabanni da mambobi 26 a hukumomi da kwamitocin gwamnatin tarayya guda 10.

Daga cikin waɗanda aka naɗa akwai tsohon Gwamnan Jihar Ekiti, Ayo Fayose, wanda zai jagoranci Hukumar Samar da Wutar Lantarki a Karkara (REA). Haka kuma, Manjo Janar Junaid Bindawa ya zama shugaban Hukumar Albashi da Tsarin Albashin Ma'aikatan Ƙasa.

Sauran naɗe-naɗen sun haɗa da Dr. Abuh Mohammed a matsayin Darakta Janar na Hukumar Ƙidaya ta Ƙasa (NPC), Dr. Akinola Odeyemi a matsayin shugaban Kamfanin Ciniki da Wutar Lantarki na Najeriya (NBET), da kuma Dr. Anthony Inalegwu Godwin a matsayin shugaban Hukumar Makamashin Nukiliya ta Najeriya.

Shugaban ƙasar ya kuma amince da kafa sabuwar Hukumar Kula da Alhakin Kasafin Kuɗi, inda ya naɗa Dr. Abdullahi Maikano Saidu a matsayin shugabanta, tare da naɗa Shuni Muhammad Dahiru a matsayin Babban Sakataren Hukumar Yaƙi da Jahilci ta Ƙasa.

Sanarwar ta ce naɗe-naɗen na daga cikin matakan gwamnati na ƙarfafa hukumomin tarayya da inganta gudanar da ayyukansu.